*بداهـــه_سرایی شاعران بختیاری در سال ۱۳۹۷*

مونه وا صد غم و درد آفریدن...
مونه وا رنگ و ری زرد آفریدن
تو چی افتو ، مونه هم جورِ بارون...
تونه گرم و مونه سرد آفریدن
🖋️ مهدی_رئیسی_روزگار

تونه وا افتوِ نو آفریدن
تونه وا گِلِ نیکو آفریدن
تونه شاد و مونه همسا غم و درد
مونه لیش و تونه خو آفریدن
🖋️ مرتضی_علیزاده

مونه حاک و تونه باد آفریدن...
مونه غم و تونه شاد آفریدن
تو آخر نومِته شیرین نهادن...
مونه هم جورِ فرهاد آفریدن
🖋️ مهدی_رئیسی_روزگار

مونه بی کینه و جَر آفریدن
تونه واخنجر و شَر آفریدن
تو بی رحمی دلت ز جنس بَرده
مونه وا دو تیه تَر آفریدن
🖋️ رضی_للـری_بهداروند

مونه چی نَمِ بارون آفریدن
تونه چی رود کارون آفریدن
مونه وا حسرت و دردِ غریوی
تونه چی چشمه سارون آفریدن
🖋️ آستاره_اسیوند

تونه چی چشمه اَوجاز آفریدن...
به جور کوگ تاراز آفریدن
مونه جور فقیری دینه چاله...
مونه لیش و تونه ناز آفریدن
🖋️ مهدی_رئیسی_روزگار

تونه نَشمین و رَشتال آفریدن
مونه بی پَر و بی بال آفریدن
مو چی کوگی اگوی اشکسته بالم
تونه خوشخط و خوش خال آفریدن
🖋️ فاطمه_داوودی

تونه چی رودِ کارون آفریدن..
تونه از دل و از جون آفریدن
مونه جورِ گِلالی حُشک و تشنه
تونه چی برف و بارون آفریدن
🖋️ مهدی_رئیسی_روزگار

تونه چی بوته ی یاس آفریدن
مونه چی برگ ریواس آفریدن
تو رَنگت چی اَنار سُهر دورک
مونه چی گل بِرنجاس آفریدن
🖋️ آستاره_اسیوند

مونه وا دردِ سنگین آفریدن...
مونه غمگینِ غمگین آفریدن
تونه هم آفریدن وا دلی شاد
مونه وا حَرس وا خین آفریدن
🖋️ مهدی_رئیسی_روزگار

مونه وا غمِ عالم آفریدن
مونه ویرون،،چی بَم آفریدن
خُماخُم مینه غم هردم اسوسم
تونه گُل و مونه شَم آفریدن
🖋️ صفر_نصیری
شَم‌=شمع

تونه روز و مونه شَو آفریدن...
تونه چی چشمه ی اَو آفریدن
کد و بالاته هرکس دیده دونه
مونه حُکماً ز جنسِ برنَو آفریدن
🖋️ مهدی_رئیسی_روزگار

تونه چی گرز اَرزَن آفریدن
مونه فرهاد کوهکَن آفریدن
تونه چی میرصیاد کهنه کاری
مونه چی کوگ و پازَن آفریدن
🖋️ صادق_رئیسی_للری

مـونه جـورِ گِلِ سُـهر آفریدن
تونه با اَو ، گُل و دُور آفریدن
به تو سُجده کنم هر روز و هر شَو
تونه سی مو اِگوی مُــهر آفریدن
🖋️ آستاره_اسیوند

تونه اَر وا دل و جون آفریدن
زلال اَر جورِ بارون آفریدن
موهم از ایل پاک بختیارم
مونه برنو سرِ شون آفریدن
🖋️ مهدی_رئیسی_روزگار

مونه برنو سر شُون آفریدن
تونه سیم چی دل و جون آفریدن
مونه وا شادی و حَنده سرلَو
تونه هم نــامسلمون آفریدن
🖋️ آستاره ـــ اُسیوند

تونه ز جنس اَفتَو آفریدِن
مونه وا درد وا تَو آفریدِن
دوای دردِ درمـونی خـوت
تونه مَهی منِ شَو آفریدِن
🖋️ پروین _ علاسوند

مـونه چی رُسـتم زال آفـریدن
تونه بی نُقص تی کال آفریدن
مونه چی شِرعَلیمِردون چالنگ
تـونه چـی بـی مَـریـم آفـریدن
🖋️ سجاد نادری _ اسنکی

مونه وا درد اُ رَنج آفریدن
مونه مین کوه لَنج آفریدن
تونه میونَ پَر قو اُ پَنبه
مونه مین یک بعلاوه پنج آفریدن
🖋️ فیروز کشوری بداهه

مونه لر و گل دار آفریدن
تونه شیرین و نازدار آفریدن
منه مترسکی و لوی باغی
تونه با ایدی و کانال آفریدن
🖋️ حسین جعفری

همو سو که حوانه آفریدن
ز درد و غم دلانه آفریدن
خوس و آدوم یه گَم زیدن به سیوی
سی جندوم هیوه هانه آفریدن
🖋️ شهناز کریمی

ِِز وختی که حوانه آفریدِن
غم و اندوه پیانه آفریدِن
خدا دونا که هیچ زهشت نداره
فقط دُشمِن سی دانه آفریدن
🖋️ پروین علاسوند

تونه سالوم مونه کور آفریدن
تونه اِسبی مونه بور آفریدن
تونه گل آفریدن مینه باغی
مونهِ گیلک دمِ شور آفریدن
🖋️ افسانه جمشیدی

مونه تنهای تنها آفریدن
میون برف و صحرا آفریدن
تونه یادوم نی یا کی یا چجوری
ولی سی قلب ایما آفریدن
🖋️ ش. علی

مونه چی تیل بی دا آفریدن
میـن دشـتو صحـرا آفریدن
تو نه چی کوگ کوه آسماری
خیف خوش سر و پا آفریدن
🖋️شکوفه بختیاری

مونه مِـرد و تونه زن آفریـدن
تونه ز گوشت این تن آفریدن
تونه زیبا و رعنا و دلارام
مونه چی سنگ صد من آفریدن
🖋️ علی. کرج

مونه چی سکه و پیل آفریدن
تونه وا زور و تحمیل آفریدن
مونه ریواس تونه شاخ چویلی
دو تا مونه منه ایل آفریدن
🖋️شکوفه بختیاری

منبع: کانال شبکه اجتماعی مجازی دپژوهشگاه فرهنگ و ادب بختیاری واتساپ تاریخ ۱۸ اردیبهشت ماه ۱۴۰۴