((بنگ هیاری))
یه دم یادت بیا اوشوکه مه بید
دلم جور یه کوگی بی پنه بید
غم کن کن مالا زید و بالس
دم کفت دوپولون تی به ره بید
من سردمه پوییز عهد بستم
سر ره مالکنون مندیر نشستم
بیو بی تو شو وروزم یکی بید
چه کاری دا غم دیریت ودستم
باهار اوید زنو من بختیاری
کلوس ریشه ایزنه و آسماری
پیایل مالمون رو خور کن
زنه گوشم زنو بنگ هیاری
پلشتوک دلت عزم سفر کرد
زجا وارگه من شیمبار گذر کرد
اوید تا برسه من دشت لاله
که شوخین زیداوید مال خورکرد
اسپیدی برف کلار سی تو
یه مشک پرزپیرغارسی تو
وفا وهمدلی منجا دوتامون
بن وکلخنگ گندمکار سی تو
وقرآنی که هدمن پیرمریک
الهی رنگ ریت انار دورک
من باغ باهارون بی قضا بوی
من تی دشمنت اوسور دشتک
دلت مثل دل بی رنگ کارون
لووت شیرین ترازانگیرناغون
مثال رز بری چی گل بپاشی
و سوزی گردوا باغ آورگون
بیو یه دم سرکهریز چهراز
نشینیم دوریک همدل وهمراز
بریم دس من دس وایک بخونیم
زنیم قهقه وابا کوگون تاراز

ایرج فتاح پور