دلم خهسه ي انتظار تنه

شو ايگرده و تهل خوار تنه

چو خيني كه من بلگ گل ايزنه

بهارم هني هم بهار تنه

غزل پرپرش سي تيا كالت

دلم تشنه ي حال واحوالت

نيويي و خو من تيم مرده ي

دل هاشقم جون ا در برده ي

نيويي وهفته چ سال ايروه

شو و روزم اور زغال ايروه

يه شو من دلم مهر تو پا گرو

گريوه رسي من بتم جاگرو

كه ايسوس تش كو و داغت هني

يكي ايزنه بنگ وباغت هني

تو لاله ي كه دلمون روشن كني

هو كه ايده نومي و زونم تني

تيل خيست اور زمهسونم

ونومت قواله ي همه جونم

مير چشمه شرم ا دلت نيكنه ؟

خدا ار بوينت ولت نيكنه

سرم خهسه ي گپل مردمه

و لرز تو من خينم سردمه

تو تاكي وداد دلم ايرسي

مو تا كي بمهنم واي بي كسي ؟

گپو مالمي قاصد سر ديار !

ايويي و سر ايرسه انتظار

ايويي سوار وتفنگ ايرسه

خدا انتظارم سر اومه ! بسه !

تو برنو ودهس ايرسي پر صدا

وبنگ تفنگت ايري تا خدا

نه منگشت والبرز جات ايگرن

نه وقتي بيويي نهات ايگرن

تو وا 313 نور ايوي

چراغ دلم سي تيه كور ايوي

و چاله ي دلم بي تش زي بيو

همي جمعه حالم خش زي بيو

سيده سليمه موسوی